Winter-Stadt-OL und Trainingsstart im 2022

Heja zäme

Mir hoffed, ihr hend alli schöni Festtäg dörfe verbringe. Nach em Wiehnachtsschmaus isch vor em Start is neue Jahr und dademit staht de Winter-OL vor de Tür. Im 2022 findet de am 9. Januar in Uster statt, isch also en Stadt-OL. Wege COVID-19 isch es en 2G-Alass (ab 16 Jahr) und es münd sich alli bis am Mäntig 3. Januar via picoevents amelde. I de Usschriebig findet ihr no meh wichtigi Informatione. Bezüglich Startziit: wähled doch eini zwüsched 10:30 und 11:30 us. Mir werded uf de folgendi Zug gha:

S8 (vorderste 2. Klass Wage obe)

Zürich HB ab 08:37

Thalwil ab 08:54

Horgen ab 09:00

Wädenswil ab 09:07

Pfäffikon SZ an 09:19

Pfäffikon SZ ab 09:22 S5

Uster an 09:50

Und denn no en wichtigi Information bezüglich de Trainings im neue Jahr:

Gemäss de neue Regle vom BAG sind eusi Trainings entweder mit 2G und Maskepflicht oder aber mit 2G+ erlaubt. Mir hend gfunde, dass Maskepflicht nöd guet umsetzbar isch. Drum sind ab em 4. Januar eusi Trainings 2G+. Das heisst: gimpft/genesesen + Booster/Test. De Pool-Test wo ihr i de Schuel/Gschäft mached, zählt da au mit, ihr münd eifach aghä, dass ihr e Bestätigung bruched. Bezüglich de Tests gilt folgendes: PCR-Tests (au Pool-Tests) sind 72 Stunde nach em Probeigang gültig, Antigen-Schnelltests sind 24 Stunde gültig. Die Regle geltet übrigens nur für die ab 16i (also inkl 16-Jährige). Wichtig isch no, dass ihr eues Zertifikat und au en Uswiis immer debi hend, falls sie eus goge kontrolliere chömmed. Falls ihr spezifischi Frage hend, dörfed ihr eu natürli jederziit bi eus melde.

So und etz wünsched mir eu allne en guete Rutsch is neue Jahr, hoffentlich chönnd ihr nochli Schnee gnüsse.