trophy

JOM-Zähler

△225
Ø22.5
☺50

Skiweekend Stoos

19. - 21.1. - Ausschreibung

Chlaus-OL

Ausschreibung

10. Stadt-Sprint-Späschäl

Ausschreibung (17.12.17)
Organisation: OLG Schaffhausen

Seniorenlager 2018

Ausschreibung - Anmeldung
 

Berichte und Mitteilungen

Spezial
2017
2016
2015
2014
2013
2012
ältere...

Bericht von der OLZ-Klubmeisterschaft 2014 (31.05.14/eh)

Klupmäischterschaft isch, ...

..., wänn äimal im Jahr d’Zimmerbärgler zämme chömmed und di drüü schööne, fascht nöije, grüän-gääl-schwarze Klupmäischter-Liibli frisch vätäiled, äso dass nöd immer di Gliiche vo dem Ruum und däre Eer tüänd zeere, sondärn äso dass alli d’Schanse händ, sich es Jahr lang chönne mit KlupmäischterIn uf em Rugge aazschriibe und koomisch isch numme, dass grad alli vo de letschtjäärige SiigerInne gar nöd erscht aaträtte sind zum irä Titel z’väteidige.

..., wänn de Dani rüäft und öppe driisg OLZ-lär dem Ruäf folged, obwohl är dasmal äigätlich gar nöd hät chönne rüäfe mit sim bööse Zaa, sondärn eener zwitschäred hät, was mer aber au wider nöd chan schriibe, will’s suscht guät d’Helfti vo de Lüüt falsch västaat und mäint, er hegi de Aalass usäm elektronische Vogelchefi use organisiert – also alles was rächt isch!

..., wänn am Viätel ab zwei wükli alli pünktlich deet uf däre Höchi under de Autobahn stönd, ja wäisch deete, wot häre chunsch, wännt us em Sihltal ufe dur das malerische Dörfli laufsch, mit dene sümpatische Uuriiwohner und dene unglaubliche, braachligände, turistische Möglichkäite, also deete wo amig s’Poschtauto und de rooti Bus de Bärgpriis undäränand uusmached – ja genau uf de Gattikerhöchi.

..., wänn-t-Di chasch für drüü väschide farbigi Kategoriä aamälde, wo d’Schtreckädate nöd mit Kilo- oder Hööämeter aagää wärded, sondärn mit äre Rächnig, wo immer s’gliiche Resultat git und’s Di so väwirrt, dass-t-Di also für zwei mal d’Helfti aamäldisch und dänn trotzdem drüü mal en Drittel muäsch ränne, wills vo dene au z’vill hät, aber vo dä viär mal ein Viärtel häts z’wenig und drumm müänd di äinte de-n-andäre uushälfe, obwool d’Rächnig ja gliichvill gitt – jänu, us driisg Lüüt giz zää Drüüärgruppe und de Rescht hät de Dani mit vill Fingärschpitzägfüül und vorbehandläte Charte gmänätscht.

..., wänn di zää schtärchschte Löifer mit väbundäne Auge anän schträng ghäime Platz gfaare wärded und e schiinbar woolbekannti OL-Charte it Händ truckt übärchömed und je nach Tämpäramänt zeerscht luäged und übärleged oder dänn loosränned und spurted und sprinted und jaged und stürmed und seckled und haschted, bis s’märked, dass da öppis nöd ganz stimmt, nämmli d’Sihl duruuf flüüsst oder de Kompass in Süüde zäiged oder d’Charte irgändwie schpinnt.

..., wänn de Urs mitem Jonah und em Julian und em Edu zäme ä Drüüärgruppe mached – äs Trio grande soozäge - und är als eerschte mit öppe sibe Minute Vorschprung uf all die Juseïn Bolz chann a sini Tiimkolege übergää und die scho am Schtart mit Ziiliilauftempo losraased gogä de ganzi Wald aaluäge.

..., wänn de Alain mitem Jonas und de Silvia zäme en andäri Drüüärgruppe sind und er uf de zwäite Schtrecki alli Gägner überholt, abhänkt und -tröchned und mit guätem Vorschprung sis Tiim uf di dritti Schtrecki schickt und scho dävoo chan tröime, dass es dasmal klapped mit em Klupmäischtertitel, won er doch s’letzschtämal Päch ghaa hät mit Öppärem, wo d’Kategorii väwächsled und vor imm gunne hät, obwools deete nöd äsoo kompliziert gsii isch, wi diä Rächnige dasmal.

...,wänn d’LöifärInne guät gluuned zu iräm Lauf started, dänn lang-lang nüme gsee wärded und mitäme Huufe Ärfaarige wider zrugg chömmed, wo’s zum Teil gar nöd händ welle mache, six wills mit däre schpiägälvächeerte Charte nöd zrächt choo sind, six will di wiisse Fläcke genau uusgrächned deete s’Laufgebiät vätecked, wo si händ dure welle oder gschtande sind, oder six will d’Pöschte äso ungwonnt chlii gsii sind, das märs fascht besser ghöört als gseet hät (piipse nämmli, und da wäred mer wider bim Vogelchefi) – ja de Legände naa sölled sogar e paar Pöschte ire Standort välaa und amäne andäre Ort anägschtande sii, alses uf de Charte iizeichned gsii isch.

..., wänn nach föif Ablöösige zwei Tiims ganz nööch zäme sind und’s nuna drufaa chunt, öb de Martin oder d’Serafina dä Zefisammälplatz, wo so ungnau wi möglich ufäre Charte iiträit isch, wommer nöd dörf in Wald mitnää, sondern muäs usswändig leere, dä Platz mit sim ghäimnisvolle Name also zeerscht fint, schtämpled und zruggbringt und mär na ä Wuche spööter drüber räätzled, öb’s ächt a de Kondizion, a de Gschnälligkeit oder am usswändig leere gläge isch, dass jetzt di Einti und nöd de Anderi gunne hät.

..., wänn am Schluss de Jan Hug und d’Marlies und d’Serafina chönd juble, wills gunne und s’es vädiänt händ, wills s’beschte Tiim gsii sind und wills übärhaupt au ä sovill mached und gmacht händ oder s’eerschtmal sit langem wider däbii sind und sowiso, wills alli dene Drüü möged gönne und sich mit ine fröied und’s äifach di richtige SiigerInne sind.

..., wänn’s dänn na lang nöd färtig isch, will d’Sunne schiint und es Füürli brännt und en Grill parad isch und de Waldweiher äifach öppis vom Schönschte isch und vom Zimmerbärger OL här na Unmänge vo Würscht und Brot und Sämf und Kätschöp umä sind und wills vom sCool-Cup na z’Trinke und d’Elisabeth en Guggelhupf pache und na mänge öppis Guäts däbii hät und wills a somäne Aalass eifach ä soovill z’prichte git.

..., wänn miär im Nachhinein am Dani und sine Hälfer ganz härzlich tanked für de unvägässlichi Aalass und für di ville Ärfaarige mit koomische Charte, wommer da händ chönne mache, für di luschtige Ideeä und für di unnachaamlichi, bis uf de letschti Meter spannändi Gruppezämäsetzig.

..., wänn d’SiigerInne äigätlich müässted de Pricht schriibe, abär dänn ä Wuche spööter tuusigunddrüü Gründ findet, worum genau das nöd sötti möglich sii und dänn äine iispringt, wo jetz hoffätli nüüt vägässe hät.